Architecture

മലപ്പുറത്ത് ഒരു ഹോട്ട് സ്‌പോട്ട് കൂടി; 1,47,010 പേര്‍ നിരീക്ഷണത്തിൽ

തിരുവനന്തപുരം: കേരളത്തിൽ ഇന്ന് 86 പേർക്ക് കൊവിഡ് സ്ഥിരീകരിച്ചു. വാർത്താക്കുറിപ്പിലൂടെ ആരോഗ്യ മന്ത്രാലയമാണ് സംസ്ഥാനത്തെ സ്ഥിതിഗതികളും വിവരങ്ങളും വ്യക്തമാക്കിയത്. പാലക്കാട് ജില്ലയിലെ ഒരു ആരോഗ്യ പ്രവര്‍ത്തകയ്ക്കും രോഗം ബാധിച്ചു.
സംസ്ഥാനത്ത് ഇന്ന് 86 പേര്‍ക്ക് കോവിഡ് സ്ഥിരീകരിച്ചു. മലപ്പുറം ജില്ലയില്‍ നിന്നുള്ള 15 പേര്‍ക്കും ആലപ്പുഴ ജില്ലയില്‍ നിന്നുള്ള 10 പേര്‍ക്കും കാസർകോട് 9, കൊല്ലം8, തിരുവനന്തപുരം 7, പേര്‍ക്കും കോട്ടയം, തൃശൂര്‍, വയനാട് ജില്ലകളില്‍ നിന്നുള്ള 6 പേര്‍ക്ക് വീതവും പാലക്കാട്, കോഴിക്കോട്, കണ്ണൂര്‍ ജില്ലകളില്‍ നിന്നുള്ള 5 പേര്‍ക്ക് വീതവും എറണാകുളം ജില്ലയില്‍ നിന്നുള്ള 3 പേര്‍ക്കും പത്തനംതിട്ട ജില്ലയില്‍ നിന്നുള്ള ഒരാള്‍ക്കുമാണ് രോഗം സ്ഥിരീകരിച്ചത്.

ഒരു കൊവിഡ് മരണം കൂടി
സംസ്ഥാനത്ത് ഒരു കൊവിഡ് മരണം കൂടി റിപ്പോർട്ട് ചെയ്‌തു. തിരുവനന്തപുരം മെഡിക്കൽ കോളേജിൽ ചികിത്സയിലായിരുന്ന വൈദികനാണ് മരിച്ചത്. നാലാഞ്ചിറ സ്വദേശി കെ ജി വര്‍ഗീസാണ് മരിച്ചത്. ഇതോടെ സംസ്ഥാനത്ത് കൊവിഡ് മരണം 11 ആയി. നാലാഞ്ചിറ സ്വദേശിയായ ഇദ്ദേഹം ശ്വസകോശരോഗത്തെ തുടർന്ന് മെഡിക്കൽ കോളേജിൽ ചികിത്സയിലായിരുന്നു. മെയ് 20ന് ഒരു വാഹനാപകടത്തെ തുടർന്നാണ് കെ ജി വർഗീസിനെ ആശുപത്രിയിൽ പ്രവേശിപ്പിച്ചത്. ഇദ്ദേഹത്തിന് വിദേശ യാത്രാചരിത്രമോ കൊവിഡ് രോഗികളുമായി സമ്പർക്കമോ ഉണ്ടായിരുന്നതായി വ്യക്തതയില്ല. മരണശേഷമാണ് ഇദ്ദേഹത്തിന് കൊവിഡ് സ്ഥിരീകരിച്ച വിവരം മാധ്യമങ്ങളിലൂടെ പുറത്തു വന്നത്.​കേരളത്തിൽ നിരീക്ഷണത്തിലുള്ളവരുടെ എണ്ണം
സംസ്ഥാനത്തെ വിവിധ ജില്ലകളിലായി 1,47,010 പേര്‍ നിരീക്ഷണത്തിലുണ്ട്. ഇവരില്‍ 1,45,670 പേര്‍ വീട് – ഇന്‍സ്റ്റിറ്റിയൂഷണല്‍ ക്വാറന്റൈനിലും 1340 പേര്‍ ആശുപത്രികളിലും നിരീക്ഷണത്തിലാണ്. 200 പേരെയാണ് ഇന്ന് ആശുപത്രിയില്‍ പ്രവേശിപ്പിച്ചത്. കഴിഞ്ഞ 24 മണിക്കൂറിനിടെ 2421 സാമ്പിളുകള്‍ പരിശോധനയ്ക്കായി അയച്ചു. ഇതുവരെ 71,068 വ്യക്തികളുടെ (ഓഗ്‌മെന്റഡ് സാമ്പിള്‍ ഉള്‍പ്പെടെ) സാമ്പിള്‍ പരിശോധനയ്ക്ക് അയച്ചു. ഇതില്‍ ലഭ്യമായ 67,249 സാമ്പിളുകളുടെ പരിശോധനാഫലം നെഗറ്റീവ് ആണ്. ഇതുകൂടാതെ സെന്റിനല്‍ സര്‍വൈലന്‍സിന്റെ ഭാഗമായി ആരോഗ്യ പ്രവര്‍ത്തകര്‍, കുടിയേറ്റ തൊഴിലാളികള്‍, സാമൂഹിക സമ്പര്‍ക്കം കൂടുതലുള്ള വ്യക്തികള്‍ മുതലായ മുന്‍ഗണനാ ഗ്രൂപ്പുകളില്‍ നിന്ന് 15,101 സാമ്പിളുകള്‍ ശേഖരിച്ചതില്‍ 13,908 സാമ്പിളുകള്‍ നെഗറ്റീവ് ആയി

​സംസ്ഥാനത്തെ പുതിയ ഹോട്ട് സ്‌പോട്ടുകൾ
സംസ്ഥാനത്ത് കൊവിഡ് കേസുകൾ വർധിക്കുന്നതിനിടെ ഇന്ന് പുതുതായി ഒരു ഹോട്ട് സ്‌പോട്ട് കൂടി നിലവിൽ വന്നു. മലപ്പുറം ജില്ലയിലെ ആനക്കയമാണ് പുതിയ ഹോട്ട് സ്‌പോട്ട്. നിലവില്‍ 122 ഹോട്ട് സ്‌പോട്ടുകളാണ് ഉള്ളത്.

​46 പേർ വിദേശത്ത് നിന്ന് എത്തിയത്
ഇന്ന് കൊവിഡ് സ്ഥിരീകരിച്ചവരിൽ 46 പേര്‍ വിദേശത്ത് നിന്ന് എത്തിയവരാണ്. കുവൈറ്റ് 21, യുഎഇ.16, സൗദി അറേബ്യ 6, മാലിദ്വീപ് 1, ഖത്തര്‍ 1, ഒമാന്‍ 1 എന്നിങ്ങനെയാണ് കണക്കുകൾ. മറ്റ് സംസ്ഥാനത്തിൽ നിന്ന് എത്തിയ 26 പേർക്കാണ് കൊവിഡ് സ്ഥിരീകരിച്ചത് മഹാരാഷ്ട്ര 9, തമിഴ്‌നാട് 7, കര്‍ണാടക 5, ഡല്‍ഹി 3, ഗുജറാത്ത് 1, രാജസ്ഥാൻ 1 എന്നിങ്ങനെയാണ് കണക്ക്. 12 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. വയനാട് ജില്ലയിലെ 6 പേര്‍ക്കും മലപ്പുറം ജില്ലയിലെ 4 പേര്‍ക്കും കാസര്‍ഗോഡ്, കണ്ണൂര്‍ ജില്ലകളിലെ ഒരാള്‍ക്ക് വിതവുമാണ് സമ്പര്‍ക്കത്തിലൂടെ രോഗം സ്ഥിരീകരിച്ചത്.

സംസ്ഥാനത്തെ സാഹചര്യങ്ങൾ
സംസ്ഥാനത്ത് കൊവിഡ് കേസുകൾ വർധിക്കുന്നത് ആശങ്കയുണ്ടാക്കുന്നുണ്ട്. രണ്ടാഴ്‌ചയായി രോഗബാധിതരുടെയും നിരീക്ഷണത്തിലുള്ളവരുടെയും കണക്കുകൾ ഉയരുകയാണ്. ആശുപത്രികളിലും വീടുകളിലുമായി ചികിത്സയിലും നിരീക്ഷണത്തിലുള്ളവരുടെയും എണ്ണം ഉയർന്ന നിലയിലാണ്. പ്രവാസികൾ മടങ്ങിയെത്തുന്നതും മറ്റ് സംസ്ഥാനങ്ങളിൽ നിന്ന് കൂടുതൽ ആളുകൾ സംസ്ഥാനത്തേക്ക് എത്തുന്നതും തുടരുകയാണ്. ഇതിനിടെയാണ് കൊവിഡ് കേസുകളിൽ വർധനയുണ്ടായത്.

​കൂടുതൽ രാജ്യങ്ങളിൽ നിന്ന് കൊച്ചിയിലേക്ക് സർവീസ്
വന്ദേ ഭാരത് മിഷൻ്റെ അടുത്തഘട്ടത്തിൽ കൂടുതൽ രാജ്യങ്ങളിൽ നിന്ന് കൊച്ചിയിലേക്ക് വിമാന സർവീസുകൾ. ഒറ്റപ്പെട്ട രാജ്യങ്ങളിൽ കുടുങ്ങിക്കിടക്കുന്നവരെ നാട്ടിലെത്തിക്കാനാണ്ണ് കേന്ദ്ര സർക്കാർ ഒരുങ്ങുന്നത്. ഈ മാസം അഞ്ചുമുതൽ ഈജിപ്ത് തലസ്ഥാനമായ കയ്‌റോ, ഫിലിപ്പീൻസിലെ സെബു തുടങ്ങിയ സ്ഥലങ്ങളിൽ നിന്നെല്ലാം ഇന്ത്യയിലേക്കു സർവീസ് നടത്താനാണു തീരുമാനം. ജിബൂട്ടി, വിയറ്റ്‌നാം, കയ്റോ, ഉക്രൈൻ, ലണ്ടൻ, സെബു എന്നിവടങ്ങളിൽ നിന്നാണ് ആളുകളെ എയർ ഇന്ത്യ നാട്ടിലെത്തിക്കുക. മാൾട്ടയിൽ നിന്ന് എയർ മാൾട്ട ജൂൺ ഒമ്പതിനും ലണ്ടനിൽ നിന്ന് ബ്രിട്ടിഷ് എയർവെയ്‌സ് 10നും കൊച്ചിയിലേക്ക് സർവീസ് നടത്തും.

രാജ്യത്ത് കൊവിഡ് കേസുകൾ വർധിക്കുന്നു
രാജ്യത്ത് കൊവിഡ് രോഗികളുടെ എണ്ണം വർധിക്കുകയാണ്. ചൊവ്വാഴ്‌ച മൂന്ന് മണിവരെയുള്ള കണക്കുകൾ പ്രകാരം ഇന്ത്യയിലെ രോഗബാധിതരുടെ എണ്ണം 198,706 ആയി. ഇതുവരെ 5,598 പേർക്ക് ജീവൻ നഷ്‌ടമായി. മഹാരാഷ്‌ട്രയിലാണ് ഏറ്റവും കൂടുതൽ കൊവിഡ് കേസുകൾ നിലവിലുള്ളത്. തമിഴ്‌നാട്, ഗുജറാത്ത്, ഡൽഹി സംസ്ഥാനങ്ങളാണ് പിന്നാലെയുള്ളത്.

Related Posts

Leave a Reply

Your email address will not be published. Required fields are marked *